რა არის კორონავირუსი?

კორონავირუსი (COVID-19) არის კორონავირუსის ახალი შტამი, რომლით ადამიანთა დაავადების პირველი შემთხვევა 2019 წელს ჩინეთში, ჰუბეის პროვინციაში დაფიქსირდა.

  • CO – შემოკლებით კორონა (CORONA)
  • VI – ვირუსი (VIRUS)
  • D – დაავადება (DISEASE)
  • 19 – 2019 წლის ახალი კორონავირუსი

ჯანმრთელობის ექსპერტების შეშფოთებას იწვევს ახალი ვირუსის შესახებ მწირი ინფორმაცია. ცნობილია რამდენიმე ფაქტი, მათ შორის ის, რომ ახალი კორონავირუსი განეკუთვნება იმავე ჯგუფს, რომელსაც „მძიმე მწვავე რესპირატორული სინდრომის“ (SARS) გამომწვევი. განსაკუთრებით საფრთხილოა ეს ვირუსი მისი მოქმედების ხასიათიდან გამომდინარე.

მსოფლიო ჯანდაცვის ორგანიზაციამ (WHO) 2020 წლის 11 მარტს ოფიციალურად გამოაცხადა კორონავირუსის პანდემია 2019-2020.

როგორ ვრცელდება ახალი კორონა ვირუსი?!

    • წვეთოვანი გზით, ხველით, ცემინებით, საუბრისას;
    • თვალზე, პირზე და ცხვირზე დაუბანელი ხელის შეხებით;
    • დაავადებულთან მჭიდრო კონტაქტით, შეხება, ხელის ჩამორთმევით.

ვინ წარმოადგენს ახალი კორონავირუსის განსაკუთრებულ რისკ-ჯგუფს?!

ცალსახაა, რომ კოვიდ-19 გავრცელების ტემპი მზარდია. მის რისკ-ჯგუფს შესაძლოა ნებისმიერი პირი წარმოადგენდეს, თუმცა ჯანმო გამოყოფს ორ ჯგუფს, რომელთაც განსაკუთრებული სიფრთხილე მართებთ. ეს გახლავთ, 60 წელს გადაცილებული პირები და გულსისხლძარღვთა და სხვადასხვა ქრონიკული დაავადების მქონე ადამიანები.

რა არის ახალი კორონა ვირუსის სიმპტომები?!

 COVID-19-ის სიპტომები მიმსგავსებულია პნევმონიის და მწვავე რესპირატორული დაავადების სიმპტომებთან:

  • ცხელება;
  • ხველება (მათ შორის, მეტად დამახასიათებელია, მშრალი ხველა);
  • ტკივილი გულ-მკერდის არეში;
  • სუნთქვის გაძნელება;
  • ფილტვების ანთება.

რა დროა საჭირო COVID-19-ის სიმპტომების გამოსავლენად?!

უმეტესად, კორონავირუსული დაავადების სიმპტომები ვლინდება ინფიცირებიდან 5-6 დღის მანძილზე, თუმცა შესაძლოა გამოვლიდეს 1-დან 14 დღემდე პერიოდში.

რამდენ ხანს ძლებს ვირუსი მყარ ზედაპირზე?!

ახალი კორონავირუსის გავრცელების გზა წვეთოვანია. თუ დაინფიცირებული ადამიანის საუბრისას, ხველისას ან ცემინებისას გავრცელებული წვეთი მოხვდება მყარ ზედაპირზე, შესაძლოა, ეს გახდეს გავრცელების წყარო. COVID-19 ვირუსი 72 საათამდე ძლებს პლასტმასსა და უჟანგავ ფოლადზე, 24 საათამდე სპილენძზე და 4 საათზე ნაკლები დროის განმავლობაში – მუყაოზე.

სწორედ ამიტომ, პრევენციისთვის, აუცილებელია ხშირად გაწმინდოთ თქვენი სამუშაო სივრცე სპირტის შემცველი ან სპეციალური სადეზინფექციო სითხით.

როგორ დავიცვათ თავი ახალი კორონა ვირუსისგან?!

ახალი კორონავირუსისგან თავის დასაცავად საჭიროა, მიჰყვეთ გრიპის და სხვა რესპირაციული დაავადებების პრევენციის ზოგად რეკომენდაციებს:

  • დაიბანეთ ხელები საპნით, ხშირად და გულდასმით
  • (განსაკუთრებით: დახველებისა და დაცემინების შემდეგ, საჭმლის გაკეთების ან მიღების წინ, საპირფარეშოთი სარგებლობამდე და შემდგომ, საზოგადოებრივი თავშეყრის ადგილზე ყოფნამდე და შემდგომ);
  • თუკი ხელის დაბანის საშუალება არ გაქვთ, დაიმუშავეთ სპირტის 70%-იანი შემცველობის ჰიგიენური გელით;
  • ნუ შეეხებით თვალებს, ცხვირსა და პირს ხელით;
  • მოერიდეთ დაავადებულ, ან სურდოსა და გრიპის სიმპტომატიკის მქონე ადამიანებთან კონტაქტს;
  • დაცემინების ან დახველებისას აიფარეთ მოხრილი იდაყვი ან ერთჯერადი ხელსახოცი ცხვირისა და პირის არეზე. გამოყენებული ხელსახოცი მოათავსეთ ნაგვის ურნაში;
  • დაიცავით დისტანცია საზოგადოებრივი თავშეყრის ადგილებში და ატარეთ სამედიცინო ნიღაბი.

მსოფლიო ჯანდაცვის ორგანიზაციის მიერ გაცემული რეკომენდაციები ვრცლად შეგიძლიათ იხილოთ, საქართველოს დაავადებათა კონტროლის ცენტრის ვებ-გვერდზე – www.ncdn.ge